روزہ کشائی اور دعوت افطار متبرک محافل مگر
چھوٹے بچے روزہ رکھیں تو ان کی حوصلہ افزائی ضرور کریں۔ وہ اسی صورت ممکن ہے کہ آپ ان کے کزنز اور دوستوں کے ہمراہ دیگر عزیز و اقارب کو افطار پر مدعو کریں۔ بچے کے لیے تحائف خریدیں اور جتنا اہتمام دوسری تقریبات وغیرہ آراستہ کرنے میں صرف کرتے ہیں اس سے بڑھ کر ان مذہبی اجتماعات اور افطار دعوتوں پر توجہ دیں، بچے کو ہار، پھول اور اس کے پسندیدہ اور اچھے لباس پہنائیں۔ اس کی پسندیدہ ڈشز کا اہتمام کریں اور اگر ممکن ہوتو اس یادگار موقع کو کیمرے میں محفوظ بھی کرلیں۔ یہ زندگی کا خوبصورت ترین لمحہ ہوتا ہے جو تصویروں اور یادوں کی صورت میں ذہن و دل میں ہمیشہ کے لیے محفوظ ہو جاتا ہے۔ اس روزہ دار بچے کی دیکھا دیکھی دوسرے چھوٹے بچوں کو بھی روزہ رکھنے کی تحریک کے ساتھ ساتھ مذہبی شعائر اوراخلاقی تربیت سے اچھے مسلمان بننے کی ترغیب بھی ملتی ہے اور ہاں افطار پارٹیوں میں کھانے کا ضیاع اور نماز کا ضیاع ہرگز نہ ہو۔
اے خاتون خانہ غور کر!رمضان سونے کا مہینہ نہیں
نیند میں کمی کی شکایت کرکے زیادہ تر وقت سوتے ہوئے گزارنے کی عادت بھی نازیبا کہلاتی ہے۔ مسلمان کو اپنے فرائض کی تکمیل کے لیے شخصی اور ذاتی آرام کم کرنا ضروری ہے۔ یہ خدا کے سوا کوئی نہیں جانتا کہ یہ ماہِ صیام زندگی کے اگلے برس میں دوبارہ نصیب ہوسکے گا یا نہیں۔
نماز کا اوّل وقت ہی سعد ہوتا ہے
پانچ وقت کی نمازوں کے علاوہ نماز تراویح کا اہتمام کرنا جس قدر ضروری ہے اتنا ہی اوّل وقت یعنی اذان ہونے کے بعد اور قضا کے وقت سے پہلے نماز ادا کرنا افضل ہوتا ہے۔ کوشش کیجئے کہ اس ماہ فرضوں کے ساتھ سنت اور نوافل کی ادائیگی بھی بروقت ہوتی رہے تراویح میں طویل دورانیے کا قیام جسم اور روحانی طہارت کا وسیلہ ہوتا ہے اس نماز کو باقاعدہ اور باجماعت ادا کیا جاتا ہے اس کا اہتمام ضرور کرلیا کریں۔
نماز تہجد کی ادائیگی کسی نعمت سے کم نہیں
سحری میں صرف آدھا گھنٹہ پہلے بیدار ہوکر تہجد کے نوافل کی ادائیگی ہو جائے اور آپ اپنے رب سے گڑگڑا کر دعائیں مانگ لیں، کہتے ہیں کہ ابتدائے سحر کی یہ دعائیں خالی نہیں جاتیں۔ عرش بریں سے انعامات کی ایسی بارشیں شاید ہی کسی اور ماہ ہوں گی۔ معتبر جانئے اس ماہِ صیام کو!
زکوٰۃ و خیرات کی فضیلت
ہمارا مذہب بھائی چارے اور اخوت کو فروغ دیتا ہے لیکن ساتھ ہی ساتھ مال و دولت کی منصفانہ تقسیم کا بھی خیال رکھنے پر زور دیتا ہے۔ زکوٰۃ اپنے سفید پوش رشتے داروں اور پڑوسیوں سے شروع ہوکر چیدہ چیدہ مستحقین تک پہنچانا دین کے اہم ستون کی تکمیل کرنا ہے۔ بچوں کو بھی خیرات کے اس عمل میں اپنے ہمراہ شریک کرلیں اور انہیں اپنے شہر کے خیراتی اداروں میں لے جائیں۔ ان کے ہاتھ سے صدقات کی تقسیم کروائیں تاکہ انہیں دھرتی سے جڑے رہنے اور عام آدمی کے دکھوں اور مصائب کا بھرپور اندازہ ہوسکتے۔
آخری عشرہ تلاش کرنے سے کیا ملتا ہے
جاگنے والی راتوں کی تاریخوں کو یاد رکھیں اور اپنی پیاری نیند کو قربان کرکے ذکر الٰہی میں کچھ وقت صرف کریں یقیناً آپ ہی وہ خوش نصیب انسان ہیں جسے زندگی کی نوید ملی تو کیوں نہ اسے نیک اور صالح مسلمانوں کی طرح گزارا جائے۔